ໃນວັນທີ 18 ມິຖຸນາ 2024, ທີ່ ກະຊວງແຜນການ ແລະ ການລົງທຶນໄດ້ມີ ພິທີເຊັນ ສັນຍາວ່າດ້ວຍການ ສຳຫຼວດ ແຮ່ອັງຕີມອນ ແລະ ແຮ່ຕິດພັນ ໃນເນື້ອທີ່ 141,14 ກມ2 ຢູ່ເຂດບ້ານຫ້ວຍຖ້ຳ, ບ້ານໜອງຈອງ, ບ້ານດອນໄຊ, ບ້ານາອາງ, ບ້ານປາກຫຼິງ, ບ້ານພູໝ້ຽງ ເມືອງຈອມເພັດ ແຂວງຫຼວງພະບາງ ລະຫວ່າງ ລັດຖະບານ ແຫ່ງ ສປປ ລາວ ຮ່ວມ ກັບ ບໍລິສັດ ເອເວີກຣີນ ຈຳກັດຜູ້ດຽວ. ເປັນກຽດເຂົ້າຮ່ວມໃນພິທີເຊັນສັນຍາຄັ້ງນີ້ໂດຍ ທ່ານ ປອ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ທອງພັດ ອິນທະວົງ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່, ພ້ອມດຽວກັນນີ້ກໍ່ຍັງມີບັນດາທ່ານຫົວໜ້າຫ້ອງການ,ຫົວໜ້າກົມ, ຮອງກົມ,ຮອງຫົວໜ້າຫ້ອງການ, ຫົວໜ້າພະແນກ, ຮອງຫົວໜ້າພະແນກ ຈາກສູນກາງ ແລະ ທ້ອງຖີ່ນ ພະນັກງານທີກ່ຽວຂ້ອງຈາກບໍລິສັດກໍ່ໄດ້ເຂົ້າຮ່ວມ.
ໂດຍອິງຕາມ ໃບມອບສິດຂອງທ່ານ ນາຍົກລັດຖະມົນຕີ ສະບັບເລກທີ 117/ນຍ, ລົງວັນທີ 05 ມິຖຸນາ 2024 ທີ່ມອບສິດໃຫ້ກະຊວງແຜນການ ແລະ ການລົງທຶນ ເປັນຜູ້ເຊັນສັນຍາ, ເຊິ່ງຕາງໜ້າໃຫ້ລັດຖະບານ ແຫ່ງ ສປປ ລາວ ເຊັນໂດຍ ທ່ານ ປອ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ເຊັນເປັນພະຍານໂດຍ ທ່ານ ທອງພັດ ອິນທະວົງ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່ ແລະ ທ່ານ ຈິນດາວົງ ໂພສີຄຳ ຫົວໜ້າພະແນກແຜນການ ແລະ ການລົງທຶນ ແຂວງຫຼວງພະບາງ ກັບ ບໍລິສັດ ເອເວີກຣີນ ຈຳກັດຜູ້ດຽວ ເຊິ່ງຕາງໜ້າເຊັນໂດຍ ທ່ານ ສຸລິວົງ ຫຼວງອາໄພ ຮອງອຳນວຍການບໍລິສັດ ເອເວີກຣີນ ຈຳກັດຜູ້ດຽວ ແລະ ເຊັນເປັນພະຍານ ໂດຍ ທ່ານ ແສງເພັດ ໃຈຍະວົງ ທີ່ປຶກສາບໍລິສັດ ເອເວີກຣີນ ຈຳກັດຜູ້ດຽວ. ນອກນັ້ນ, ທາງບໍລິສັດຍັງໄດ້ມອບເງິນຊ່ວຍເຫຼືອລ້າໃຫ້ແກ່ລັດຖະບານ ຈຳນວນ 1,000,000 ໂດລາສະຫະລັດ ແລະ ມອບເງິນຊ່ວຍເຫຼືອລ້າໃຫ້ແກ່ ອົງການປົກຄອງ ແຂວງຫຼວງພະບາງຈຳນວນເງິນ 500,000 ໂດລາສະຫະລັດ.