ໃນວັນທີ 16 ສິງຫາ 2024, ທີ່ ກະຊວງແຜນການ ແລະ ການລົງທຶນໄດ້ມີ ພິທີເຊັນ ສັນຍາວ່າດ້ວຍການສຳປະທານ ພັດທະນາບໍ່ແຮ່ ( ສະບັບຕໍ່ອາຍຸເທື່ອທີ່ 1 ) ໂຄງການຂຸດຄົ້ນ ແລະ ຜະລິດແຮ່ສັງກະສີ, ແຮ່ຊືນ ແລະ ບາຣິດ ຢູ່ເຂດບ້ານສົມສະຫວາດ ແລະ ບ້ານຫວ້ຍນ້ຳເຢັນ (ເຂດຜາຫຼວງ), ເມືອງວັງວຽງ, ແຂວງວຽງຈັນ ລະຫວ່າງ ລັດຖະບານ ແຫ່ງ ສປປ ລາວ ຮ່ວມ ກັບ ບໍລິສັດ ກຸ່ມ ມີ່ງຕ້າ (ລາວ) ຈຳກັດ ເປັນກຽດເຂົ້າຮ່ວມໃນພິທີເຊັນສັນຍາຄັ້ງນີ້ໂດຍ ທ່ານ ປອ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ທອງພັດ ອິນທະວົງ ຮອງລັດຖະມົນຕີ ກະຊວງ ພະລັງງານ ແລະ ບໍ່ແຮ່ ພ້ອມດຽວກັນນີ້ກໍ່ຍັງມີບັນດາ ທ່ານຫົວໜ້າຫ້ອງການ, ຫົວໜ້າກົມ, ຮອງກົມ, ຮອງຫົວໜ້າຫ້ອງການ, ຫົວໜ້າພະແນກ, ຮອງຫົວໜ້າພະແນກ ຈາກສູນກາງ ແລະ ທ້ອງຖີ່ນ ພະນັກງານທີກ່ຽວຂ້ອງຈາກບໍລິສັດກໍ່ໄດ້ເຂົ້າຮ່ວມ.
ໂດຍອິງຕາມ ໃບມອບສິດຂອງທ່ານ ນາຍົກລັດຖະມົນຕີ ສະບັບເລກທີ 138/ນຍ, ລົງວັນທີ 03 ກໍລະກົດ2024 ທີ່ມອບສິດໃຫ້ກະຊວງແຜນການ ແລະ ການລົງທຶນ ເປັນຜູ້ເຊັນສັນຍາ, ເຊິ່ງຕາງໜ້າໃຫ້ລັດຖະບານ ແຫ່ງ ສປປ ລາວ ເຊັນໂດຍ ທ່ານ ປອ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ເຊັນເປັນພະຍານໂດຍ ທອງພັດ ອິນທະວົງ ຮອງລັດຖະມົນຕີ ກະຊວງ ພະລັງງານ ແລະ ບໍ່ແຮ່ ແລະ ທ່ານ ເຕັ່ງເມັ່ງ ຢ່າງລືໄຊ ຫົວໜ້າພະແນກ ແຜນການ ແລະ ການລົງທຶນ ແຂວງວຽງຈັນ ກັບ ກຸ່ມ ມີ່ງຕ້າ (ລາວ) ຈຳກັດ ເຊິ່ງຕາງໜ້າເຊັນໂດຍ ທ່ານ ZHANG MINGLI ປະທານບໍລິສັດ ກຸ່ມ ມີ່ງຕ້າ (ລາວ) ຈໍາກັດ ແລະ ເຊັນເປັນພະຍານ ໂດຍ ທ່ານ ນ. ກິດຕະ ພົມມະສອນ ຮອງປະທານບໍລິສັດ ກຸ່ມ ມີ່ງຕ້າ (ລາວ) ຈຳກັດ.