ພີທີເຊັນສັນຍາການຮ່ວມມືແຜນງານອາສະໝັກອົດສະຕຣາລີ

by | Mar 24, 2023 | ການເຄື່ອນໄຫວ, ຂ່າວເດັ່ນ | 0 comments

ໃນວັນທີ 22 ມີນາ 2023, ທີ່ຫ້ອງກຽດຕິຍົດ, ກະຊວງ ແຜນການ ແລະ ການລົງທຶນ ໄດ້ມີພິທີເຊັນສັນຍາບົດບັນທຶກຄວາມເຂົ້າໃຈກ່ຽວກັບການຮ່ວມມືແຜນງານອາສາສະໝັກອົດສະຕຣາລີ,ຕາງໜ້າໃຫ້ລັດຖະບານ ສປປ ລາວ ລົງນາມໂດຍ ທ່ານ ນາງ ພອນວັນ ອຸທະວົງ, ຮອງລັດ ຖະມົນຕີ, ກະຊວງແຜນການ ແລະ ການລົງທຶນ ແລະ ຕາງໜ້າໃຫ້ລັດຖະບານອົດສະຕຣາລີ  ລົງນາມໂດຍ ທ່ານ ໂພລ ແຄລີ, ເອກອັກຄະລັດຖະທູດອົດສະຕຣາລີ ປະຈຳ ສປປ ລາວ. ມີທ່ານຜູ້ຕາງໜ້າຈາກກະຊວງການຕ່າງປະເທດ, ກະຊວງ ພາຍໃນ, ກະຊວງອຸດສາຫະກໍາ ແລະ ການຄ້າ, ກະຊວງສຶກສາທິການ ແລະ ກິລາ, ກະຊວງສາທາລະນະສຸກ, ກະຊວງກະສິກໍາ ແລະ ປ່າໄມ້, ກະຊວງແຮງງານ ແລະ ສະຫວັດດີການສັງຄົມ ແລະ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມເປັນສັກຄີພະຍານໃນພິທີດັ່ງກ່າວ.​

ລັດຖະບານອົດສະຕຣາລີ ໃຫ້ການສະໜັບສະໜູນ ສປປ ລາວ ໃນການບັນລຸເປົ້າໝາຍການພັດທະນາແບບຍືນຍົງ ໂດຍການສະໜອງອາສາສະໝັກອົດສະຕຣາລີ ຜູ້ທີ່ມີທັກສະ, ຄວາມສາມາດສະເພາະດ້ານເພື່ອມາ ແລກປ່ຽນບົດຮຽນ ແລະ ປະສົບການການເຮັດວຽກ ໃຫ້ແກ່ພະນັກງານພາກລັດ ຂອງ ສ ປປລາວ. ນັບແຕ່ປີ 1986 ເປັນຕົ້ນມາ, ລັດຖະບານອົດສະຕຣາລີ ໄດ້ເລີ່ມຈັດສົ່ງອາສາສະໝັກອົດສະຕຣາລີມາປະຕິບັດໜ້າທີຢູ່ ສປປ ລາວ ຊຶ່ງມາຮອດປັດຈຸບັນ ໄດ້ມີອາສາສະໝັກອົດສະຕຣາລີຫຼາຍກ່ວາ 650 ທ່ານ ໄດ້ມາປະຕິບັດໜ້າທີ່ຢູ່ ສປປ ລາວ. ໄລຍະເວລາປະຕິບັດໜ້າທີ່ຂອງອາສາສະໝັກອົດສະຕຣາລີ ຊຶ່ງປະກອບມີ ທັງໄລຍະສັ້ນ ແລະ ໄລຍະຍາວເຊັ່ນ: 3​ ເດືອນ, 6 ເດືອນ, 1 ປີ ແລະ 2 ປີ. ໂດຍອາສາສະໝັກອົດສະຕຣາລີ ໄດ້ມາປະຈໍາຢູ່ທັງຂັ້ນສູນກາງ ແລະ ທ້ອງຖິ່ນ ຊຶ່ງມາປະຕິບັດຕາມຄວາມຮຽກຮ້ອງຕ້ອງການຂອງບັນດາຂະແໜງການຕ່າງໆ ເຊັ່ນ: ຂົງເຂດ ວຽກງານການ​ສຶກສາ, ສາທາລະນະ​ສຸກ, ກະສິກຳ, ​ແລະ ພະລັງງານ ແລະ ອື່ນໆ.

ທ່ານ ນາງ ພອນວັນ ອຸທະວົງ, ຮອງລັດຖະມົນຕີ, ກະຊວງແຜນການ ແລະ ການລົງທຶນ ໄດ້ເນັ້ນວ່າ“ໂດຍອີງໃສ່ເປົ້າໝາຍການພັດທະນາແບບຍືນຍົງ ແລະ ຫຼຸດພົ້ນອອກສະຖານະປະເທດດ້ອຍພັດທະນາ, ລັດຖະບານ ສປປ ລາວ ໄດ້ໃຫ້ຄວາມສຳຄັນຕໍ່ການພັດທະນາຊັບພະຍາກອນມະນຸດ ແລະ ຊຶ່ງບັນຫາດັ່ງກ່າວ ໄດ້ບັນຈຸເຂົ້າໃນແຜນການພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025). ດັ່ງນັ້ນ, ແຜນງານອາສາສະໝັກອົດສະຕຣາລີ ຈຶ່ງເປັນໜຶ່ງໃນການຊ່ວຍເຫຼືອອັນໃຫຍ່ຫຼວງ ເພື່ອປັບປຸງຄວາມສາມາດຂອງພະນັກງານລັດຖະກອນຂອງ ສປປ ລາວ ພ້ອມທັງຍັງສອດຄ່ອງກັບໂຄງການພັດທະນາປະເທດຊາດຂອງພວກເຮົາ”

ພ້ອມດຽວກັນນັ້ນ, ທ່ານ ໂພລ ເເຄລີ, ເອກອັກຄະລັດຖະທູດອົດສະຕຣາລີ ປະຈຳ ສປປ ລາວ ໄດ້ກ່າວກ່ຽວກັບແຜນງານນີ້ວ່າ: “ພວກເຮົາມີຄວາມພາກພູມໃຈເປັນຢ່າງຍິ່ງຕໍ່ການປະກອບສ່ວນຂອງ ແຜນງານອາສາສະໝັກອົດສະຕຣາລີ ເຂົ້າໃນການພັດທະນາເສດຖະກິດ-ສັງຄົມ ທັງປະກອບສ່ວນເສີມຂະຫຍາຍສາຍພົວພັນສອງຝ່າຍ ແລະ ການເຊື່ອມຕໍ່ລະຫວ່າງປະຊາຊົນສອງຊາດຂອງພວກເຮົາ.”