ໃນວັນທີ 6 ກັນຍາ 2024 ຜ່ານມາ, ທີ່ພະແນກແຜນການ ແລະ ການລົງທຶນແຂວງ ຈໍາສັກ. ທ່ານ ປອ. ເພັດ ພົມພີພັກ, ລັດຖະມົນຕີກະຊວງແຜນການ ແລະ ການລົງທຶນ ໄດ້ພົບປະໂອ້ລົມ ພະນັກງານຫຼັກແຫຼ່ງຂອງ ພະແນກ ແຜນການ ແລະ ການລົງທຶນແຂວງ ເນື່ອງໃນໂອກາດທີ່ໄດ້ລົງເຄື່ອນໄຫວວຽກງານ ຢູ່ທີ່ແຂວງ ຈໍາປາສັກ ແລະ ແຂວງ ເຊກອງ, ມີທ່ານ ຫົວໜ້າຫ້ອງການ ແລະ ທ່ານ ຫົວໜ້າກົມສົ່ງເສີມການລົງທຶນ ກະຊວງແຜນການ ແລະ ການລົງທຶນ, ທ່ານຫົວໜ້າພະແນກ, ຮອງຫົວໜ້າພະແນກ, ຫົວໜ້າຂະແໜງ, ຮອງຫົວໜ້າຂະແໜງ ແລະ ພະນັກງານຫຼັກແຫຼ່ງຂອງພະແນກແຜນການ ແລະ ການລົງທຶນແຂວງ ຈຳປາສັກ ເຂົ້າຮ່ວມ.
ທ່ານ ປອ. ສຸກສະຫວັນ ວິໄລວົງ, ຫົວໜ້າພະແນກແຜນການ ແລະ ການລົງທຶນແຂວງ ຈໍາປາສັກ ໄດ້ລາຍງານໂດຍຫຍໍ້ວຽກງານທີ່ພົ້ນເດັ່ນ ໃນປີ 2024 ໃຫ້ຊາບວ່າ: ປີ 2024 ແຂວງ ຈໍາປາສັກ ມີໂຄງການທັງໝົດ 226 ໂຄງການ (ມູນຄ່າລວມສະພາ 6.296,22 ຕື້ກີບ, ມູນຄ່າສັນຍາ 5.877,28 ຕື້ກີບ, ມູນຄ່າປະຕິບັດວຽກສຳເລັດ 4.153,48 ຕື້ກີບ), ໄດ້ຮັບງົບປະມານການລົງທຶນຂອງລັດ ປີ 2024 ຈາກກະຊວງແຜນການ ແລະ ການລົງທຶນ ທັງໝົດ 75.731,8 ລ້ານກີບ ຫຼື 75,73 ຕື້ກີບ ແລະ ໄດ້ຈັດສັນໃສ່ໂຄງການ ຈໍານວນ 226 ໂຄງການ, ໃນນັ້ນປະກອບມີ: ໂຄງການສົມທົບທຶນຕ່າງປະເທດ ມີ 10 ໂຄງການ, ມູນຄ່າ 4.534,6 ລ້ານກີບ; ໂຄງການສືບຕໍ່ ມີ 100 ໂຄງການ, ມູນຄ່າ 43.688,47 ລ້ານກີບ ແລະ ບ້ວງຈົດຮັບ-ຈົດຈ່າຍ 2 ໂຄງການ, ມູນຄ່າ 6.000 ລ້ານກີບ; ໂຄງການຊໍາລະ ໜີ້ສິນ ມີ 98 ໂຄງການ, ມູນຄ່າ 17.878,73 ລ້ານກີບ; ໂຄງການສະເໜີໃໝ່ ມີ 16 ໂຄງການ, ມູນຄ່າ 3.630 ລ້ານກີບ, ໂຄງການທີ່ສຳເລັດ ແລະ ສິ້ນສຸດ (ຕັດອອກຈາກບັນຊີ) ພາຍຫຼັງໄດ້ຊໍາລະຕາມແຜນປີ 2024 ແລະ ບ້ວງເງິນ ເກີນແຜນ ປີ 2023 ສາມາດຊໍາລະສໍາເລັດສິ້ນສຸດໂຄງການ ໄດ້ຈໍານວນ 34 ໂຄງການ, ໃນນັ້ນ: ໂຄງການປະເພດກໍ່ສ້າງພື້ນຖານໂຄງລ່າງ 30 ໂຄງການ ແລະ ໂຄງການສົ່ງເສີມວິຊາການ 4 ໂຄງການ; ພ້ອມກັນນີ້, ໄດ້ສຳເລັດການສ້າງແຜນການລົງທຶນຂອງລັດປີ 2025 ເບື້ອງຕົ້ນ, ສໍາເລັດການຈັດກອງປະຊຸມ ແນະນໍາ ກ່ຽວກັບການສ້າງແຜນພັດທະນາເສດຖະກິດ-ສັງຄົມ ປີ 2025 ໃຫ້ບັນດາພະແນກການອ້ອມຂ້າງແຂວງ, ສໍາເລັດການຄົ້ນຄວ້າປະເມີນ ແລະ ຈັດເກດບົດສະເໜີໂຄງການ ປະຈໍາປີ 2024 ເພື່ອສະເໜີຈັດສັນເຂົ້າແຜນການລົງທຶນຂອງລັດ ປີ 2025, ສຳເລັດການສ້າງປື້ມ ຍຸດທະສາດການຍາດແຍ່ງທຶນຊ່ວຍເຫຼືອທາງການ ເພື່ອການພັດທະນາ ຂອງແຂວງ ຈໍາປາສັກ ຮອດປີ 2030 ແລະ ຍຸດທະສາດການຮ່ວມມືຮອບດ້ານ ລະຫວ່າງ ແຂວງຈໍາປາສັກ ກັບ ບັນດາແຂວງ/ນະຄອນ ພາກກາງ-ພາກໃຕ້ ຂອງ ສສ ຫວຽດນາມ ຮອດປີ 2030 ແລະ ສໍາເລັດການລົງຊຸກຍູ້ຕິດຕາມຄວາມຄືບໜ້າ ໃນການຈັດຕັ້ງປະຕິບັດໂຄງການລົງທຶນ ຂອງລັດ ປະຈໍາປີ 2024 ໄດ້ທັງໝົດ 56 ໂຄງການ, ເຊິ່ງຜົນຂອງການລົງເຄື່ອນໄຫວຊຸກຍູ້ ເຫັນວ່າມີ 36 ໂຄງການ ໄດ້ຮັບຜົນກະທົບທາງດ້ານເສດຖະກິດ, ລາຄາວັດສະດຸມີການເໜັງຕີງ ຈິ່ງເຮັດໃຫ້ການຈັດຕັ້ງປະຕິບັດໂຄງການຢຸດການ ເຄື່ອນໄຫວ. ສະເພາະ 6 ເດືອນຕົ້ນປີ 2024 ສາມາດກວດກາ ແລະ ຕິດຕາມ ບັນດາໂຄງການລົງທຶນຂອງພາກເອກະຊົນພາຍໃນ ແລະ ຕ່າງປະເທດ ໄດ້ຈໍານວນ 35 ໂຄງການ, ຄື: ມີຈໍານວນ 29 ໂຄງການ ທີ່ດໍາເນີນປົກກະຕິ ແລະ ມີປະສິດທິຜົນ ແລະ ປະກອບພັນທະຕໍ່ພາກລັດຢ່າງເປັນປົກກະຕິ, ທຶນຈົດທະບຽນເທົ່າກັບ 183 ລ້ານໂດລາສະຫະລັດ ແລະ ຈຳນວນ 6 ໂຄງການ ທີ່ຕ້ອງໄດ້ປັບປຸງຄືນແຜນດໍາເນີນໂຄງການໃຫ້ມີປະສິດທິພາບຂື້ນຕື່ມ ແລະ ສາມາດຍົກເລີກ ໃບທະບຽນສໍາປະທານ ໄດ້ 1 ໂຄງການ,ໂຄງການທີ່ບໍ່ມີປະສິດທິພາບ ແລະ ປະສິດທິຜົນ ບໍ່ປະຕິບັດໄປຕາມກົດໝາຍກຳນົດ, ສາມາດຍົກເລິກໃບອະນຸຍາດລົງທຶນໄດ້ 10 ໂຄງການ ແລະ ນໍາເນື້ອທີ່ດິນເຂົ້າມາໃນການຄຸ້ມຄອງຂອງພາກລັດ ຈຳນວນ 1.804 ເຮັກຕາ, ການລົງທຶນຂອງພາກເອກະຊົນພາຍໃນ ແລະ ຕ່າງປະເທດ ໃນ 6 ເດືອນຕົ້ນປີ 2024 ສາມາດອອກອະນຸຍາດລົງທຶນກິດຈະການສໍາປະທານ ໄດ້ທັງໝົດ 6 ໂຄງການ, ມູນຄ່າການອະນຸມັດ 81,42 ລ້ານໂດລາສະຫະລັດ ແລະ ໄດ້ສ້າງບັນຊີຮຽກການລົງທຶນ ຈໍານວນ 9 ໂຄງການ, ລວມເນື້ອທີ່ທັງໝົດ 2.834 ເຮັກຕາ ແລະ ສໍາເລັດການກະກຽມຂໍ້ມູນທີ່ເປັນພື້ນຖານໃນການສຳຫຼວດພົນລະເມືອງ ແລະ ທີ່ຢູ່ອາໄສ ປີ 2025.
ໃນໂອກາດທີ່ໄດ້ພົບປະໂອ້ລົມນຳພະນັກງານພະແນກແຜນການ ແລະ ການລົງທຶນ ແຂວງ ຈຳປາສັກ ທ່ານ ລັດຖະມົນຕີກະຊວງແຜນການ ແລະ ການລົງທຶນ ໄດ້ຊຸກຍູ້ໃຫ້ພະແນກ ສຶບຕໍ່ປັບປຸງລະບົບການລົງທຶນຂອງລັດ ໃນເງື່ອນໄຂໃໝ່ ໃຫ້ມີການປ່ຽນໃໝ່ຢ່າງແທ້ຈິງ ເພື່ຶອຟື້ນຟູເສດຖະກິດ, ຈັດບູລິມະສິດໂຄງການລົງທຶນຂອງລັດ, ສຸມໃສ່ໂຄງການທີ່ໃກ້ຈະມີຜົນສຳເລັດ ໂດຍມີໄລ່ລຽງທຸກການລົງທຶນ ຕ້ອງໃຫ້ມີປະສິດທິຜົນ, ມີຜົນຕອບແທນສູງ ແລະ ເຫັນຜົນໄວດ້ານເສດຖະກິດ, ຄຽງຄູ່ກັບການຈໍາກັດໂຄງການໃໝ່ ທີ່ບໍ່ມີປະສິດທິຜົນ ແລະ ບໍ່ຈໍາເປັນຮີບດ່ວນ ເພື່ອບໍ່ໃຫ້ສ້າງໜີ້ສະສົມເພີ່ມຂຶ້ນຕື່ມ, ພ້ອມນັ້ນ ກໍ່ຕ້ອງໄດ້ກວດກາຄືນໂຄງການລົງທຶນຂອງລັດ ແລະ ໂຄ’ການລົງທຶນເອກະຊົນ ທີ່ຍັງບໍ່ທັນໄດ້ປະຕິບັດ, ບໍ່ມີຄວາມຄືບໜ້າ, ບໍ່ມີປະສິດທິຜົນ, ແກ່ຍາວເວລາຈັບຈອງໂຄງການ ແລະ ເນື້ອທີ່, ຖ້າບໍ່ມີຄວາມຄືບໜ້າໃຫ້ສະເໜີໂຈະຊົ່ວຄາວ ຫຼື ຖາວອນ, ສືບຕໍ່ຄົ້ນຄວ້າທ່າແຮງບົ່ມຊ້ອນ ຕິດພັນກັບການພັດທະນາເສດຖະກິດເຂດແຄ້ນ ແລະເສດຖະກິດການຄ້າຕາມຊາຍແດນ ຂອງທ້ອງຖີ່ນຕົນ. ພ້ອມກັນນັ້ນ ສຶບຕໍ່ກະກຽມໃຫ້ການສ້າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງແຂວງ ເຊິ່ງເປັນແຜນທີ່ມີບົດບາດສໍາຄັນໃນການແກ້ໄຂ ແລະ ຟື້ນຟູເສດຖະກິດ ແລະ ຕິດພັນກັບການກະກຽມເອກະສານ ເພື່ອປະຕິບັດມະຕິກອງປະຊຸມໃຫຍ່ຄັ້ງທີ IX ຂອງແຂວງ ໃນຕໍ່ໜ້າ .
