ໃນວັນທີ 8 ກັນຍາ 2024, ທ່ານ ປອ. ເພັດ ພົມພີພັກ, ລັດຖະມົນຕີກະຊວງແຜນການ ແລະ ການລົງທຶນ, ປະທານຄະນະກຳມະການຮ່ວມມື ລາວ-ຫວຽດນາມ ແລະ ທ່ານ ຫງວຽນ ຈີ້ ຢຸ້ງ, ລັດຖະມົນຕີກະຊວງແຜນການ ແລະ ການລົງທຶນ ຫວຽດນາມ, ປະທານຄະນະກຳມະການຮ່ວມມື ຫວຽດນາມ-ລາວ ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ທີ່ໂຮງຮຽນມັດທະຍົມສົມບູນ ເມືອງດາກຈຶງ, ແຂວງເຊກອງ, ມີທ່ານ ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ຮອງເຈົ້າແຂວງ ແຂວງເຊກອງ, ທ່ານຫົວໜ້າຫ້ອງການ, ຮອງຫົວໜ້າຫ້ອງການ, ຫົວໜ້າກົມ, ຮອງຫົວໜ້າກົມ ຈາກກະຊວງແຜນການ ແລະ ການລົງທຶນ ລາວ ແລະ ຫວຽດນາມ, ຄະນະຜູ້ແທນຈາກສະຖານເອກອັກຄະລັດຖະທູດຫວຽດນາມ ປະຈຳ ສປປ ລາວ, ແຂວງກວາງຈິ, ແຂວງເທືອທຽນເຫວ້, ແຂວງ ກວາງນາມ, ນະຄອນດານັ້ງ, ຄະນະຜູ້ແທນຈາກພະແນກແຜນການ ແລະ ການລົງທຶນ ແຂວງເຊກອງ ແລະ ພາກສ່ວນກ່ຽວຂ້ອງຂອງເມືອງດາກຈຶງ ເຂົ້າຮ່ວມຢ່າງພ້ອມພຽງ.
ທ່ານ ຂັນຕີ ສີລະວົງສາ, ຮອງເຈົ້າແຂວງ ແຂວງເຊກອງ, ຜູ້ຊີ້ນຳວຽກງານເສດຖະກິດ ໄດ້ລາຍງານສະພາບຈຸດພິເສດຂອງແຂວງ ໃຫ້ຊາບວ່າ: ແຂວງ ເຊກອງ ຕັ້ງຢູ່ພາກຕາເວັນອອກສ່ຽງໃຕ້ຂອງ ສປປ ລາວ ມີເນື້ອທີ່ທັງໝົດ 7.750 ກມ2, ມີພົນລະເມືອງ 137.474 ຄົນ, ເຊິ່ງມີຊາຍແດນຕິດກັບ ສສ ຫວຽດນາມ ຍາວ 280 ກມ. ແຂວງ ເຊກອງ ປະກອບດ້ວຍ ເຂດພູດອຍ, ເຂດພູພຽງ ແລະ ເຂດທົ່ງພຽງ, ມີ 4 ເມືອງ: ເມືອງລະມາມ, ທ່າແຕງ, ກະລຶມ ແລະ ເມືອງດາກຈຶງ. ປະກອບມີດ່ານທີ່ຕິດຈອດກັບບັນດາແຂວງ ຂອງ ສສ ຫວຽດນາມ: ດ່ານສາກົນ 1 ແຫ່ງ, ດ່ານທ້ອງຖິ່ນ 1 ແຫ່ງ ແລະ ດ່ານປະເພນີ 2 ແຫ່ງ. ດ້ານການພົວພັນຮ່ວມມື ລະຫວ່າງ ແຂວງເຊກອງ ກັບບັນດາແຂວງ ຂອງ ສສ ຫວຽດນາມ ໄລຍະປີ 2017-2024 ແຂວງເຊກອງມີການຮ່ວມມືກັບບັນດາແຂວງ ຂອງ ສສ ຫວຽດນາມ 9 ແຂວງ ຄື: ແຂວງກວາງນາມ, ນະຄອນດານັ໊ງ, ກອນຕູມ, ເທື່ອທຽນເຫວ້, ບິ່ງດິ້ງ, ຢາລາຍ, ດັກລັກ, ກວາງຈີ້ ແລະ ກວາງຫງາຍ, ເຊິ່ງໃນແຕ່ລະປີໄດ້ຊ່ວຍເຫຼືອ ໃນການກໍ່ສ້າງຊັບພະຍາກອນມະນຸດ ລະດັບຊັ້ນສູງ, ປະລິນຍາຕີ, ປະລິນຍາໂທ ແລະ ປະລິນຍາເອກໃຫ້ແກ່ແຂວງເຊກອງ ມີທັງໝົດ ຈຳນວນ 560 ທຶນ ແລະ ທຶນຊ່ວຍເຫຼືອໃນການ ພັດທະນາພື້ນຖານໂຄງລ່າງ ທັງໝົດ ຈຳນວນ 83.973 ລ້ານດົ້ງ. ພິເສດ: ໃນໄລຍະການແຜ່ລະບາດຂອງພະຍາດ ໂຄວິດ-19 ກໍໍ່ໄດ້ຮັບການຊ່ວຍເຫຼືອ ເຄື່ອງອຸປະກອນການແພດ ເພື່ອສະກັດກັ້ນ ແລະ ປ້ອງກັນພະຍາດໂຄວິດ-19 ຈາກບັນດາແຂວງພາກກາງ ແລະ ພາກໃຕ້ ຂອງ ສສ ຫວຽດນາມ ລວມມີມູນຄ່າທັງໝົດ: 2.905 ລ້ານດົ້ງ. ດ້ານ ວຽກງານການສົ່ງເສີມ ແລະ ຄຸ້ມຄອງການລົງທຶນເອກະຊົນພາຍໃນ ແລະ ຕ່າງປະເທດ ປະຈຸບັນທົ່ວແຂວງເຊກອງ ມີໂຄງການລົງທຶນ FDI ທັງໝົດ 124 ໂຄງການ, ມີມູນຄ່າການລົງທຶນຕາມສັນຍາ 9.547 ລ້ານໂດລາ, ຄາດຄະເນການຈັດຕັ້ງປະຕິບັດຕົວຈິງ ປະມານ 3.239 ລ້ານໂດລາສະຫະລັດ ຫຼື ປະມານ 35% ຂອງມູນຄ່າການລົງທຶນ FDI ທັງໝົດ, ສ່ວນໃຫຍ່ເປັນການລົງທຶນເອກະຊົນພາຍໃນ 79 ໂຄງການ, ມູນຄ່າການລົງທຶນ 2.059 ລ້ານໂດລາສະຫະລັດ, ກວມເອົາ 61.62 %, ການລົງທຶນເອກະຊົນຕ່າງປະເທດ 45 ໂຄງການ, ມູນຄ່າການລົງທຶນ 1.311 ລ້ານໂດລາສະຫະລັດ, ກວມເອົາ 38.37 %, ໃນນັ້ນ ໄດ້ມີການລົງທຶນຂອງ ຫວຽດນາມ 27 ໂຄງການ, ມູນຄ່າ 1,071 ລ້ານໂດລາສາຫະລັດ ກວມອັດຕາສ່ວນ 54%, ໄທ 7 ໂຄງການ, ມູນຄ່າ 329.7 ລ້ານໂດລາສະຫະລັດ, ກວມອັດຕາສ່ວນ 25%, ຈີນ 5 ໂຄງການ, ມູນຄ່າການລົງທຶນ 263 ລ້ານໂດລາສະຫະລັດ, ກວມອັດຕາສ່ວນ 20% ແລະ ປະເທດອື່ນໆອີກ 6 ໂຄງການ ມູນຄ່າ 11.4 ລ້ານ, ກວມອັດຕາສ່ວນ 1%, ໂຄງການທັງໝົດ. ສຳລັບການລົງທຶນຂອງຂອງ ສສ ຫວຽດນາມ ໄລຍະຜ່ານມາ: ໃນ 27 ໂຄງການ ກວມອັດຕາສ່ວນ 54% ຂອງການລົງທຶນຕ່າງປະເທດ; ມີມູນຄ່າການລົງທຶນທັງໝົດ: 1,071 ລ້ານໂດລາສາຫະລັດ, ໃນນັ້ນ, ຂັ້ນສູນກາງອະນຸຍາດ 11 ໂຄງການ, ມູນຄ່າການລົງທຶນ 1,043 ລ້ານໂດລາສາຫະລັດ ແລະ ຂັ້ນແຂວງອະນຸຍາດ ທັງໝົດ 14 ໂຄງການ ມູນຄ່າການລົງທຶນ 18 ລ້ານໂດລາສາຫະລັດ; ໃນນັ້ນຂົງເຂດພະລັງງານໄຟຟ້ານໍ້າຕົກມີ 3 ໂຄງການ; ຂົງເຂດບໍ່ແຮ່ 6 ໂຄງການ; ຂົງເຂດກະສິກໍາ 14 ໂຄງການ ແລະ ຂົງເຂດການບໍລິການ 2 ໂຄງການ. ຜ່ານການຊຸກຍູ້, ຕິດຕາມ ແລະ ຕີລາຄາ ເຫັນວ່າການລົງທຶນຂອງພາກສ່ວນເອກະຊົນຈາກ ສສ ຫວຽດນາມ ໂດຍລວມແມ່ນໄດ້ປະກອບສ່ວນສ້າງໃຫ້ເສດຖະກິດ-ສັງຄົມຂອງແຂວງເຊກອງ ມີການຂະຫຍາຍຕົວ ສ້າງວຽກເຮັດງານທໍາໃຫ້ປະຊາຊົນ ຖືເປັນກໍາລັງແຮງດ້ານການຜະລິດ ເພື່ອການສົ່ງອອກທີ່ສໍາຄັນ ເປັນຕົ້ນ ແມ່ນດ້ານແຮ່ທາດ, ພະລັງງານ, ຢາງພາລາ, ກາເຟ ແລະ ອື່ນໆ. ໃນນັ້ນ, ຫົວໜ່ວຍທຸລະກິດຈາກ ສສ ຫວຽດນາມ ຍັງໄດ້ປະກອບສ່ວນໃນການສ້າງສີມືແຮງງານ, ນໍາເອົາແຫຼ່ງທຶນຕ່າງໆ ສຸມໃສ່ໃນການດໍາເນີນໂຄງການຂະໜາດໃຫຍ່ຈໍານວນໜື່ງ ເປັນຕົ້ນ: ໂຄງການກໍ່ສ້າງໄຟຟ້າຄວາມຮ້ອນຖ່ານຫີນເຊກອງ ກະລຶມ 1.800 ເມກາວັດ ແລະ ໂຄງການຊື້ຂາຍຖ່ານຫີນ, ໂຄງການຂຸດຄົ້ນ ແລະ ປຸງແຕ່ງບົກຊິດ, ໂຄງການເຂື່ອນໄຟຟ້ານໍ້າຕົກເຊຂະໝານ 3, ໂຄງການປູກຢາງພາລາ, ໂຄງການປູກ ແລະ ປຸງແຕ່ງກາເຟ, ໂຄງການປູກໝາກຖົ່ວລຽນ.
ໃນໂອກາດທີ່ໄດ້ມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ທີ່ໂຮງຮຽນມັດທະຍົມສົມບູນ ເມືອງດາກຈຶງ ທ່ານ ຫງວຽນ ຈີ້ ຢຸ້ງ, ລັດຖະມົນຕີກະຊວງແຜນການ ແລະ ການລົງທຶນ ຫວຽດນາມ, ປະທານຄະນະກຳມະການຮ່ວມມື ຫວຽດນາມ-ລາວ ໄດ້ມອບເງິນສົດ ຈຳນວນ 10.000 ໂດລາສະຫາລັດ ໃຫ້ແຂວງເຊກອງ ແລະ ມອບໃຫ້ໂຮງຮຽນມັດທະຍົມສົມບູນ ເມືອງດາກຈຶງ ຈຳນວນ 5000 ໂດລາສະຫາລັດ ເພື່ອປະກອບສ່ວນໃນພັດທະນາຂອງແຂວງ, ການບຳລຸງປັບປຸງໂຮງຮຽນ. ພ້ອມນັ້ນ ກໍໍ່ຍັງໄດ້ມອບເຄື່ອງກອງນໍ້າສະອາດ ໃຫ້ໂຮງຮຽນ ຈຳນວນ 8 ເຄື່ອງ ແລະ ມອບໃຫ້ເມືອງດາກຈຶງ ຈຳນວນ 2 ເຄື່ອງ.
