ລັດຖະມົນຕີກະຊວງແຜນການ ແລະ ການລົງທຶນ ພ້ອມຄະນະ ລົງຕິດຕາມ, ຊຸກຍູ້ ແລະ ປຶກສາຫາລືແຜນການຟື້ນຟູໄພພິບັດທາງທຳມະຊາດ ຢູ່ແຂວງຫົວພັນ

ໃນວັນທີ 13 ພະຈິກ 2024 ຜ່ານມາ, ທ່ານ ປອ. ເພັດ ພົມພິພັກ, ລັດຖະມົນຕີກະຊວງແຜນການ ແລະ ການລົງທຶນ ພ້ອມດ້ວຍຄະນະ ໄດ້ລົງຕິດຕາມ, ຊຸກຍູ້ ແລະ ປຶກສາຫາລືແຜນການຟື້ນຟູໄພພິບັດທາງ         ທໍາມະຊາດ ພາຍຫຼັງທີ່ຖືກຜົນກະທົບຈາກໄພນໍ້າຖ້ວມ ຮ່ວມກັບ ຄະນະກໍາມະການຄຸ້ມ​ຄອງໄພພິບັດຂັ້ນແຂວງ ແຂວງຫົວພັນ. ທ່ານ ພຸດພັນ ແກ້ວວົງໄຊ, ຮອງເຈົ້າແຂວງ ແຂວງຫົວພັນ ໄດ້ລາຍ​ງານຜົນກະທົບຂອງໄພພິບັດແຂວງຫົວພັນ ນັບແຕ່ເດືອນມັງກອນ ຫາ ເດືອນຕຸລາ 2024 ໃຫ້ຮູ້ວ່າ: ສະພາບໄພພິບັດ ທີ່​ເກີດຈາກເຫດການນໍ້າຖ້ວມ, ດິນເຊາະເຈື່ອນ ແລະ ນໍ້າໄຫຼຊຸ ໃນຂົງເຂດທີ່ຢູ່ອາໄສ, ພື້ນຖານໂຄງລ່າງ, ໂຮງຮຽນ, ເຄຫະສະຖານ, ລະບົບຊົນລະປະທານ, ເສັ້ນທາງ, ຂົວ – ລະບົບໄຟຟ້າ – ນໍ້າປະປາ-ນໍ້າລິນ, ເນື້ອທີ່ທໍາການຜະລິດ ແລະ ສັດລ້ຽງຂອງພໍ່ແມ່ປະຊາຊົນ ຖືກຜົນກະທົບເສຍຫາຍ ຢູ່ 10 ເມືອງ, 277 ບ້ານ, 5,288 ຄອບຄົວ ໃນນີ້ກະທົບໜັກກ່ອນໝູ່ແມ່ນຢູ່ 07 ເມືອງ ຄື: (ເມືອງ ຊ່ອນ, ເມືອງຫົວເມືອງ, ເມືອງຮ້ຽມ, ເມືອງຊໍາເໜືອ, ເມືອງ ວຽງໄຊ, ເມືອງ ຊໍາໃຕ້ ແລະ ເມືອງກັວນ ), ເຮືອນເສຍຫາຍ 968 ຫຼັງ, ບາດເຈັບ 5 ຄົນ, ເສຍຊີວິດ 3 ຄົນ, ລວມມູນຄ່າເສຍຫາຍທັງໝົດ 240,286,222,211 ກີບ (​ສອງຮ້ອຍສີ່ສີບຕື້ສອງຮ້ອຍແປດສີບຫົກລ້ານສອງແສນຊາວສອງພັນສອງຮ້ອຍສີບເອັດກີບ). ນອກນັ້ນ ທ່ານລັດຖະມົນຕີ ຍັງໄດ້ຮັບຟັງ ແຜນຄວາມຕ້ອງການຊ່ວຍເຫຼືອຟື້ນຟູສຸກເສີນໄລຍະສັ້ນ (ໄລຍະ 03 – 06 ເດືອນ) ປີ 2024-2025 ແລະ ແຜນຄວາມຕ້ອງການຊ່ວຍເຫຼືອຟື້ນຟູໄລຍະຍາວ, ພ້ອມທັງ ໄດ້ລົງກວດເບິ່ງພື້ນທີ່ຖືກຜົນກະທົບຈາກໄພນໍ້າຖ້ວມ ຢູ່ເທດສະບານເມືອງຊຳເໜືອ.  ໃນໂອກາດທີ່ໄດ້ລົງເຄື່ອນໄຫວເຮັດວຽກຄັ້ງນີ້້ ທ່ານ ລັດຖະມົນຕີກະຊວງແຜນການ ແລະ ການລົງທຶນ ໄດ້ມອບເງິນ ຈຳນວນ 500.000.000 ກີບ (ຫ້າຮ້ອຍລ້ານກີບ) ໃຫ້ແຂວງຫົວພັນ ເພື່ອປະກອບສ່ວນຊ່ວຍເຫຼືອຟື້ນຟູໄພພິບັດນໍ້າຖ້ວມ ຢູ່ແຂວງຫົວພັນ.