ລັດຖະມົນຕີ ກະຊວງ ຜທ ຕ້ອນຮັບການເຂົ້າຢ້ຽມຂໍ່ານັບຮອງຫົວໜ້າອົງການຮ່ວມມືສາກົນເພື່ອການພັດທະນາແຫ່ງຊາດຈີນ

Mar 30, 2024 | ການເຄື່ອນໄຫວ, ຂ່າວເດັ່ນ

ໃນລະຫວ່າງວັນທີ 28-30 ມີນາ 2024, ທ່ານ Yang Weiqun ຮອງຫົວໜ້າ ອົງການຮ່ວມມືສາກົນເພື່ອການພັດທະນາ ແຫ່ງຊາດຈີນ ພ້ອມ ດ້ວຍຄະນະ ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ. ໄດ້ເຂົ້າຢ້ຽມຂໍ່ານັບ ທ່ານ ຄໍາເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ, ປະທານ ຄະນະກໍາມະການຮ່ວມມື ລາວ-ຈີນ ແລະ ຮ່ວມປຶກສາຫາລືວຽກງານທີ່ກ່ຽວຂ້ອງ ກັບ ທ່ານ ໄຊຊະນະ ສິດທິພອນ ຮອງປະທານ ຜູ້ປະຈໍາການ ຄະນະກໍາມະການຮ່ວມມື ລາວ-ຈີນ. ຈຸດປະສົງຕົ້ນຕໍ່ ຂອງການພົບປະປຶກສາຫາລືຮ່ວມກັນໃນຄັ້ງນີ້ ແມ່ນເພື່ອປະກອບສ່ວນຊຸກຍູ້ຜັນຂະຫຍາຍ ແຜນແມ່ບົດການສ້າງຄູ່ຮ່ວມຊາຕາກໍາ ລາວ-ຈີນ ສະບັບທີ2 ແຕ່ປີ 2024-2028 ທີ່ການນໍາສູງສຸດຂອງສອງປະເທດ ລາວ-ຈີນ ໄດ້ຮ່ວມລົງນາມ ໃນເດືອນ 10 ປີ 2023 ທີຜ່ານມາ; ພ້ອມນັ້ນ ກໍ່ເພື່ອສືບຕໍ່ຮ່ວມກັນປຶກສາຫາລືແລະ ຊຸກຍູ້ຜັນຂະຫຍາຍວຽກງານການຮ່ວມມືຕົວຈິງ ແລະ ເປັນຮູບປະທໍາຈໍານວນໜຶ່ງ ທີ່ການນໍາສອງຝ່າຍໄດ້ຕົກລົງເປັນເອກະພາບກັນ, ເປັນຕົ້ນ ແມ່ນສືບຕໍ່ຊຸກຍູ້ຜັນ ຂະຫຍາຍຜົນການຢ້ຽມຢາມ ສປປ ລາວ ຂອງ ສະຫາຍ ຫລົວຈ້າວຮຸ່ຍ ຫົວຫນ້າອົງການ CIDCA ໃນຕົ້ນ ເດືອນ ທັນວາ 2023 ທີ່ຜ່ານມາ, ເຊິ່ງໃນນີ້ຕົ້ນຕໍ ກໍ່ແມ່ນຊຸກຍູ້ການຈັດຕັ້ງປະຕິບັດໂຄງການຊ່ວຍເຫຼືອເພື່ອການ ພັດທະນາ ທີ່ຝ່າຍລາວ ມີຄວາມຈໍາເປັນ ແລະ ຕ້ອງການຮີບດ່ວນ, ລວມທັງວຽກງານການຮ່ວມມືອື່ນໆ ຂອງທັງສອງພາກສ່ວນ. ນອກນັ້ນ, ຄະນະຜູ້ແທນດັ່ງກ່າວຍັງໄດ້ລົງຕິດຕາມຊຸກຍູ້ການກໍ່ສ້າງໂຄງການໂຮງໝໍ ມະໂຫສົດ ໄລຍະ 2 ເຊິ່ງເປັນໂຄງການຊ່ວຍເຫຼືອລ້າ ຈາກ ລັດຖະບານຈີນ ແລະ ໄປຢ້ຽມຊົມ ເຂດພັດທະນາກວມລວມໄຊເຊດ ຖາ ເພື່ອຊຸກຍູ້ວຽກງານທີ່ກ່ຽວຂ້ອງ.