ສັນຍາວ່າດ້ວຍການສຳປະທານ CA ໂຄງການປູກຝັງ ແລະ ລ້ຽງສັດ ຢູ່ແຂວງບໍ່ແກ້ວ

by | Jan 20, 2023 | ການເຄື່ອນໄຫວ, ຂ່າວເດັ່ນ | 0 comments

ໃນວັນທີ 11 ມັງກອນ 2023, ທີ່ສະໂມສອນກະຊວງແຜນການ ແລະ ການລົງທຶນ ໄດ້ຈັດພິທີເຊັນສັນຍາສຳປະທານ CA ໂຄງການປູກຝັງ ແລະ ລ້ຽງສັດ ຢູ່ເມືອງເມິງ ແລະ ເມືອງປາກທາ  ແຂວງບໍ່ແກ້ວ ລະຫວ່າງ ລັດຖະບານ ແຫ່ງ ສປປ ລາວ ກັບ ບໍລິສັດ ດວງຈະເລີນ ອຸດສາຫະກຳ-ກະສິກຳອິນຊີ ຂາເຂົ້າ-ຂາອອກ ຈຳກັດຜູ້ດຽວ.ເປັນກຽດເຂົ້າຮ່ວມໃນພິທີເຊັນສັນຍາຄັ້ງນີ້ໂດຍ ທ່ານ ປອ. ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ທອງພັດ ວົງມະນີ ຮອງລັດຖະມົນຕີ ກະຊວງກະສິກຳ ແລະ ປ່າໄມ້, ທ່ານ ປອ. ໄຊນະຄອນ ອິນທະວົງ ຮອງລັດຖມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ພ້ອມນີ້ກໍ່ຍັງມາມີຫົວໜ້າຫ້ອງການ, ຫົວໜ້າກົມ, ຮອງກົມ, ຫົວໜ້າພະແນກ, ຮອງພະແນກ ຈາກສູນກາງ ແລະ ທ່ອງຖິ່ນ ພະນັກງານຈາກຂະແໜງການທີ່ກ່ຽວຂ້ອງ ແລະ ຕາງໜ້າຈາກບໍລິສັດກໍ່ໄດ້ເຂົ້າຮ່ວມ.

ໂດຍປະຕິບັດຕາມໃບມອບສິດຂອງທ່ານ ນາຍົກລັດຖະມົນຕີ ສະບັບເລກທີ 281/ນຍ, ລົງວັນທີ 16 ທັນວາ 2022, ທີ່ມອບສິດໃຫ້ ກະຊວງແຜນການ ແລະ ການລົງທຶນ ເປັນຜູ້ເຊັນສັນຍາຄັ້ງນີ້, ຕາງໜ້າເຊັນໂດຍ ທ່ານ ປອ. ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ເຊັນເປັນພະຍານໂດຍ ທ່ານ ສີປະໄພ  ໄຊສົງຄາມ ຫົວໜ້າຫ້ອງການກະຊວງກະສິກຳ ແລະ ປ່າໄມ້, ທ່ານ ຈອມແພງ ວິໄລສານ ຫົວໜ້າພະແນກແຜນການ ແລະ ການລົງທຶນ ແຂວງບໍໍແກ້ວ ຮ່ວມກັບ ບໍລິສັດ  ດວງຈະເລີນ ອຸດສາຫະກຳ-ກະສິກຳອິນຊີ ຂາເຂົ້າ-ຂາອອກ ຈຳກັດຜູ້ດຽວ. ເຊິ່ງຕາງໜ້າ​ເຊັນ​ໂດຍ ທ່ານ ນາງ ອາຊິງ ສີລາຊາ ຮອງປະທານບໍລິສັດ ອຸດສາຫະກຳ-ກະສິກຳອິນຊີ ຂາເຂົ້າ-ຂາອອກ ຈຳກັດຜູ້ດຽວ ແລະ ເຊັນເປັນພະຍານໂດຍ ທ່ານ ແສງປະເສີດ ລາດຊະບັນດິດ ທີ່ປືກສາໂຄງການ.