ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ ຕ້ອນຮັບເອກອັກຄະລັດຖະທູດ ແຫ່ງ ຣາຊະນາອາຈັກໄທ ຄົນໃໝ່ ປະຈໍາ ສປປ ລາວ

by | Mar 30, 2021 | ການເຄື່ອນໄຫວ | 0 comments

ໃນຕອນເຊົ້າຂອງວັນທີ 15 ມີນາ  2021, ທີ່ກະຊວງແຜນການ ແລະ ການລົງທຶນ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ເຈດສະດາ ກະຕະເວທິນ ເອກອັກຄະລັດຖະທູດແຫ່ງ ຣາຊະນາອາຈັກໄທ ຄົນໃໝ່ ປະຈໍາ ສປປ ລາວ ເນື່ອງໃນໂອກາດທີ່ທ່ານຖືກແຕ່ງຕັ້ງມາດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມປະຈໍາ ສປປ ລາວ.

ໃນໂອກາດດັ່ງກ່າວ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ ໄດ້ສະແດງຄວາມຍິນດີ ແລະ ຊົມເຊີຍຕໍ່ ທ່ານ ເຈດສະດາ ກະຕະເວທິນ ທີ່ໄດ້ຮັບການແຕ່ງຕັ້ງໃຫ້ມາດໍາລົງຕໍາແໜ່ງເປັນເອກອັກຄະລັດຖະທູດແຫ່ງ ຣາຊະນາອາຈັກໄທ ປະຈໍາ ສປປ ລາວ ແລະ ໄດ້ຕີລາຄາສູງຕໍ່ສາຍພົວພັນມິດຕະພາບອັນຍາວນານ ໃນຖານະທີ່ເປັນເພື່ອນມິດບ້ານໃກ້ເຮືອນຄຽງ      ທີ່ມີຄວາມຄ້າຍຄືກັນທາງດ້ານຮີດຄອງປະເພນີ, ວັດທະນະທໍາ, ພາສາປາກເວົ້າ, ມີຊາຍແດນຕິດຈອດກັນທັງທາງບົກ ແລະ ທາງນໍ້າ ຕັ້ງແຕ່ເໜືອຕະຫຼອດໃຕ້, ປະຊາຊົນສອງປະເທດ ໄດ້ມີການໄປມາຫາສູ່, ຄ້າຂາຍຮ່ວມກັນ ແລະ ອື່ນໆ. ປັດຈຸບັນ, ການພົວພັນ ແລະ ການຮ່ວມມື ລະຫວ່າງສອງປະເທດ ໄດ້ຮັບພັດທະນາດີຂຶ້ນເປັນກ້າວໆຢ່າງຕໍ່ເນື່ອງ, ສະພາບການຕາມບໍລິເວນຊາຍແດນ ລາວ-ໄທ ມີຄວາມສະຫງົບຮຽບຮ້ອຍໂດຍພື້ນຖານ, ສອງປະເທດ ລາວ ແລະ ໄທ ໄດ້ມີກົນໄກການຮ່ວມມືຫຼາຍລະດັບ ນັບແຕ່ຂັ້ນສູນກາງຮອດທ້ອງຖິ່ນ ແລະ ຫວັງວ່າ ທ່ານເອກອັກຄະລັດຖະທູດຄົນໃໝ່ ຈະສືບຕໍ່ຊຸກຍູ້ ແລະ ປະກອບສ່ວນສົ່ງເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ມີປະສິດທິພາບຂອງສອງປະເທດໃຫ້ເກີດນັບມື້ນັບແໜ້ນແຟ້ນກວ່າເກົ່າ.