ໃນວັນທີ 14 ມີນາ 2023, ກະຊວງແຜນການ ແລະ ການລົງທຶນ ຮ່ວມກັບ ອົງການອາຫານໂລກ, ໄດ້ລົງຕິດຕາມໂຄງການພາກສະໜາມທີ່ແຂວງຜົ້ງສາລີ, ການຢ້ຽມຢາມໃນຄັ້ງນີ້ນຳພາໂດຍ ທ່ານ ນາງ ພອນວັນ ອຸທະວົງ ຮອງລັດຖະມົນຕີ ກະຊວງແຜນການ ແລະການລົງທືນ ແລະທ່ານ ຢານ ແດນເບ ຜູ້ຕາງໜ້າອົງການອາຫານໂລກ ປະຈຳ ສປປ ລາວ, ທ່ານ ນາງ ສີສົມບູນ ອຸນາວົງ ຫົວໜ້າກົມຮ່ວມມືສາກົນ ມີບັນດາທ່ານຜູ້ຕາງໜ້າ ຈາກກະຊວງການຕ່າງປະເທດ, ກະຊວງສຶກສາທິການ ແລະກິລາ, ກະຊວງແຮງງານ ແລະສະຫວັດດີການສັງຄົມ, ກະຊວງກະສິກຳ ແລະປ່າໄມ້, ກະຊວງຊັບພະຍາກອນທຳມະຊາດ ແລະສີ່ງແວດລ້ອມ, ເຂົ້າຢ້ຽມຂໍານັບ ແລະສະເໜີລາຍງານຈຸດປະສົງ ໃຫ້ ທ່ານ ຄຳຜອຍ ວັນນະສານ ຄະນະກຳມະການສູນກາງພັກ, ເລຂາພັກແຂວງ, ເຈົ້າແຂວງ ແຂວງຜົ້ງສາລີ ຊາບກ່ຽວກັບການມາເຄື່ອນໄຫວວຽກ ທີ່ແຂວງຜົ້ງສາລີ, ພ້ອມທັງມີການປືກສາຫາລື ແລະຂໍທິດຊີ້ນຳຈາກການນຳຂອງແຂວງຜົ້ງສາລີ. ຫຼັງຈາກນັ້ນຄະນະດັ່ງກ່າວ ໄດ້ຮ່ວມກັບ ພະແນກແຜນການ ແລະການລົງທືນ ແຂວງຜົ້ງສາລີ ແລະພາກສ່ວນທີ່ກ່ຽວຂ້ອງຂອງແຂວງໄດ້ເດີ່ນໄປຢ້ຽມຢາມກິດຈະກຳໂຄງການອາຫານທ່ຽງໃນໂຮງຮຽນ, ພ້ອມພົບປະກັບອໍານາດການປົກຄອງຂັ້ນບ້ານ, ຄູອາຈານ ຜູ້ຮັບຜິດຊອບໂຄງການ ເພື່ອສົນທະນາແລກປ່ຽນການຈັດຕັ້ງປະຕິບັດກິດຈະກຳໂຄງການ, ເບີ່ງການປຸງແຕ່ງອາຫານ, ການກີນອາຫານຂອງເດັກນັກຮຽນ ແລະປູກຕົ້ນໄມ້ກີນໝາກ ໃນໂຮງຮຽນ ບ້ານ ຈີ່ໂຈະ ແລະ ໃນພາກບ່າຍໄດ້ສືບຕໍ່ໄປຢ້ຽມຢາມກິດຈະກຳໂຄງການ ໂພຊະນາການ ແລະການສ້າງຊັບສີນເພື່ອຊຸມຊົນ, ພົບປະກັບອໍານາດການປົກຄອງຂັ້ນເມືອງ ແລະບ້ານ, ຜູ້ຮັບຜິດຊອບໂຄງການ ເພື່ອສົນທະນາແລກປ່ຽນການຈັດຕັ້ງປະຕິບັດກິດຈະກຳໂຄງການ ການສ້າງນ້ຳລີນ, ທະນາຄານເຂົ້າ ແລະຢ້ຽມຢາມຄົວເຮືອນທີ່ໄດ້ຮັບທືນການປູກຟັງ ແລະລ້ຽງສັດ ທີ່ບ້ານ ຂຸນໜຸ່ມຫຼວງ ເມືອງຜົ້ງສາລີ ແຂວງຜົ້ງສາລີ.
ຕໍ່ມາໃນວັນທີ 15 ມີນາ 2023 ກໍໄດ້ຈັດກອງປະຊຸມທົບທວນການຈັດຕັ້ງປະຕິບັດແຜນຍຸດທະສາດການຮ່ວມມື ລະຫວ່າງ ລັດຖະບານ ສປປ ລາວ ແລະ ອົງການອາຫານໂລກ ປະຈຳປີ 2022 ແລະ ສ້າງແຜນບູລິມະສິດ ປະຈຳປີ 2023 ໃນຂັ້ນແຂວງ ແລະ 7 ເມືອງເປົ້າໝາຍໂຄງການ, ພ້ອມທັງຖອດຖອນບົດຮຽນໃນການຈັດຕັ້ງປະຕິບັດໂຕຈີງໃນຂັ້ນທ້ອງຖີ່ນກໍ່ຄື ແຂວງຜົ້ງສາລີ ຜ່ານມາ ເຊັ່ນ: ຂໍ້ສະດວກ, ຂໍ້ຫຍຸ້ງຍາກ, ສີ່ງທ້າທາຍ, ຂໍ້ສະເໜີຕໍ່ຄູ່ຮ່ວມງານກໍ່ຄືອົງການອາຫານໂລກ. ກອງປະຊຸມຄັ້ງນີ້ມີຜູ້ແທນເຂົ້າຮ່ວມຫຼາຍກວ່າ 60 ທ່ານ, ໃນນັ້ນ ມີບັນດາທ່ານຜູ້ຕາງໜ້າພະແນກການອ້ອມຂ້າງແຂວງ ແລະບັນດາທ່ານຮອງເຈົ້າເມືອງ ພ້ອມດ້ວຍບັນດາຜູ້ຕາງໜ້າຫ້ອງການອ້ອມຂ້າງເມືອງເປົ້າໝາຍ, ຜູ້ຈັດຕັ້ງປະຕິບັດໂຄງການທີ່ໄດ້ຮັບການຊ່ວຍເຫຼືອຈາກອົງການອາຫານໂລກ ເຂົ້າຮ່ວມໃນກອງປະຊຸມຢ່າງພ້ອມພຽງ.
