ໃນວັນທີ 16 ກັນຍາ 2022, ທີ່ກະຊວງແຜນການ ແລະ ການລົງທຶນ ຮ່ວມກັບ ຫ້ອງການປະສານງານອົງການສະຫະປະຊາຊາດ ປະຈໍາ ສປປ ລາວ ໄດ້ຈັດກອງປະຊຸມ ປຶກສາຫາລືລະດັບສູງກ່ຽວກັບການປັບປຸງຮ່າງຍຸດທະສາດການເງິນ ເພື່ອສະໜັບສະໜູນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025) ໂດຍການເປັນປະທານຮ່ວມຂອງ ທ່ານ ນາງ ພອນວັນ ອຸທະວົງ ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ນາງ ຊາລາ ເຊເກເນັດ ຜູ້ປະສານງານອົງການສະຫະປະຊາຊາດ ປະຈໍາ ສປປ ລາວ ແລະ ຂະແໜງການກ່ຽວຂ້ອງຈາກພາກລັດ ແລະ ຄູ່ຮ່ວມພັດທະນາ ເຂົ້າຮ່ວມ.
ຈຸດປະສົງກອງປະຊຸມແມ່ນເພື່ອປຶກສາຫາລືກ່ຽວກັບການກໍານົດນະໂຍບາຍ ແລະ ມາດຕະການຈັດຕັ້ງປະຕິບັດຍຸດທະສາດການເງິນ ໃຫ້ມີຄວາມສອດຄ່ອງແນໃສ່ຮັບປະກັນ ການສະໜອງທຶນແບບຍືນຍົງ ເພື່ອສະໜັບສະໜຸນການບັນລຸບູລິມະສິດ ແຜນການ 5 ປີ ຄັ້ງ ທີ IX ດ້ວຍການແລກປ່ຽນ ຄໍາຄິດຄໍາເຫັນກ່ຽວກັບຮ່າງຍຸດທະສາດການເງິນທີ່ໄດ້ສ້າງຂຶ້ນບົນຫຼັກການສາກົນ ຄື ຂອບການເງິນແຫ່ງຊາດແບບເຊື່ອມສານ (INFF) ທີ່ໄດ້ຖືກຮັບການຮັບຮອງໂດຍບັນດາປະເທດສະມາຊິກໃນກອງປະຊຸມອາດິສອາບາບາ – ອົງການສະຫະປະຊາຊາດ ເພື່ອສະໜອງທຶນການພັດທະນາ ໃນປີ 2015. ຫຼັກການດັ່ງກ່າວແມ່ນອີງໃສ່ການຄົ້ນຄວ້າບັນດາແຫຼ່ງທຶນຂອງການພັດທະນາທັງພາກລັດ ແລະ ເອກະຊົນ ໃນ ສປປ ລາວ, ໂດຍສຸມໃສ່ການແກ້ໄຂສິ່ງທ້າທາຍດ້ານງົບປະມານ ຄຽງຄູ່ກັບການປັບປຸງລະບຽບການຄຸ້ມຄອງການລົງທຶນໃຫ້ມີຄຸນນະພາບ ແລະ ຍືນຍົງ. ຮ່າງຍຸດ ທະສາດການເງິນດັ່ງກ່າວ ແມ່ນໝາກຜົນການມີສ່ວນຮ່ວມຢ່າງກວ້າງຂວາງຂອງ ພາກສ່ວນທີ່ກ່ຽວຂ້ອງ ດ້ວຍການຈັດກອງປະຊຸມປຶກສາຫາລື ແລະ ສໍາມະນາຫຼາຍທັງລະດັບ ວິຊາການ ແລະ ລະດັບສູງຫຼາຍຄັ້ງພໍສົມຄວນໃນໄລຍະເວລາເກືອບສອງປີຜ່ານມາ. ຮ່າງຍຸດທະສາດດ້ານການເງິນສະບັບນີ້ໄດ້ນໍາໄປຜ່ານການທົບທວນຢ່າງລະອຽດໃນກອງປະຊຸມປຶກສາຫາລືລະດັບວິຊາການກັບຂະແໜງການທີ່ກ່ຽວຂ້ອງ ໃນຕົ້ນເດືອນກັນຍາທີ່ຜ່ານມາ ໂດຍສະເພາະໄດ້ປຶກສາຫາລືກ່ຽວກັບນະໂຍບາຍ 54 ຂໍ້ ແລະ ມາດຕະການຈັດຕັ້ງປະຕິບັດ ຄຽງຄູ່ກັບການກໍານົດຄວາມຮັບຜິດຊອບເພື່ອໃຫ້ສາມາດຈັດຕັ້ງປະຕິບັດໄດ້ຢ່າງວ່ອງໄວ ແລະ ຄ່ອງແຄ້ວ ແນໃສ່ໃຫ້ສາມາດເລີ່ມຕົ້ນຈັດຕັ້ງປະຕິບັດໃນເດືອນມັງກອນປີ 2023 ຫາທ້າຍປີ 2025.
ທ່ານ ນາງ ພອນວັນ ອຸທະວົງ ໄດ້ເນັ້ນວ່າ ພາລະກິດຂອງຍຸດທະສາດການເງິນດັ່ງກ່າວທີ່ໄດ້ອີງໃສ່ການປຶກສາຫາລືຢ່າງເລິກເຊິ່ງ ແລະ ຮອບດ້ານກັບບັນດາພາກສ່ວນທີ່ກ່ຽວ ຂ້ອງ ແມ່ນແນໃສ່ເພື່ອຮັບປະກັນປະສິດທິຜົນຂອງການສະໜອງທຶນເພື່ອສະໜັບສະໜູນການຈັດຕັ້ງປະຕິບັດແຜນພັດທະນາແຫ່ງຊາດ ດ້ວຍການຈັດຕັ້ງປະຕິບັດມາດ ຕະການທີ່ຈະຊ່ວຍເພີ່ມປະລິມານແຫຼ່ງທຶນເພື່ອການພັດທະນາ ແລະ ປັບປຸງການຈັດສັນແຫຼ່ງທຶນທີ່ມີຢ່າງຈໍາກັດໃຫ້ສອດຄ່ອງກັບແຜນການ 5 ປີ ຄັ້ງທີ IX.
ທ່ານ ນາງ ຊາລາ ເຊເກເນັດ ເຫັນດີເປັນເອກະພາບກ່ຽວກັບ ຄວາມຈຳເປັນໃນການກໍານົດແນວທາງທີ່ຊັດເຈນ ເພື່ອຫຼຸດຜ່ອນຜົນກະທົບຈາກສິ່ງທ້າທາຍດ້ານການເງິນທີ່ ສປປ ລາວ ກໍາລັງປະເຊີນ ເຊິ່ງມີຄວາມສໍາຄັນໃນການຈັດລໍາດັບຄວາມສໍາຄັນທາງດ້ານນະໂຍບາຍ ແລະ ຄວາມເປັນເອກະພາບດ້ານການ ເງິນເພື່ອກໍານົດເປົ້າໝາຍຢ່າງມີ ຈຸດສຸມ ແລະ ຮັບປະກັນການພັດທະນາແບບຍືນຍົງໄດ້.
ພ້ອມນີ້, ກອງປະຊຸມຄັ້ງນີ້ຍັງໄດ້ປຶກສາຫາລືກ່ຽວກັບການກະກຽມໃຫ້ແກ່ກອງປະຊຸມປຶກສາຫາລະດັບສູງ ທີ່ຄາດວ່າຈະຈັດຂຶ້ນໃນທ້າຍເດືອນກັນຍາ 2022 ເພື່ອຮັບຮອງ ເອົາຍຸດທະສາດການເງິນ ເພື່ອສະໜັບສະໜູນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025) ສະບັບສຸດທ້າຍ. ກ່ອນທີ່ ຈະນໍາສະເໜີລັດຖະບານເພື່ອຮັບຮອງໃນທ້າຍປີນີ້ ເພື່ອເປັນອີກເຄື່ອງມືໜຶ່ງຂອງແຜນພັດທະນາແຫ່ງຊາດ ແລະ ເປັນແນວທາງສະໜັບສະໜູນການຈັດຕັ້ງປະຕິບັດໃນ ໄລຍະທີ່ຍັງເຫຼືອຂອງແຜນການ 5 ປີ ຄັ້ງທີ IX.