ກອງປະຊຸມຄົບຄະນະບໍລິຫານງານພັກກະຊວງ ຜທ ຄັ້ງທີ 8 ສະໄໝທີ IVຂອງ ກະຊວງແຜນການ ແລະ ການລົງທຶນ ໄດ້ຈັດຂຶ້ນໃນວັນທີ 19 ເມສາ 2022 ໂດຍການເປັນປະທານ ຂອງສະຫາຍ ຄຳເຈນ ວົງໂພສີ ເລຂາຄະນະບໍລິຫານງານພັກ ລັດຖະມົນຕີ ກະຊວງແຜນການ ແລະ ການລົງທຶນ ມີບັນດາກໍາມະການປະຈໍາພັກ, ບັນດາກໍາມະການຄະນະບໍລິຫານງານພັກກະຊວງ,ບັນເລຂາຫນ່ວຍພັກຂອງແຕ່ລະກົມ ກໍ່ໄດ້ເຂົ້າຮ່ວມ.
ສະຫາຍ ຄຳເຈນ ວົງໂພສີ ເລຂາຄະນະບໍລິຫານງານພັກ ລັດຖະມົນຕີ ກະຊວງແຜນການ ແລະ ການລົງທຶນໄດ້ກ່າວວ່າ ໃນກອງປະຊຸມໃນຄັ້ງນີ້ວ່າ ແມ່ນເພື່ອສະຫຼຸບ-ຕີລາຄາການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XIຂອງພັກ, ມະຕິ, ຄໍາສັ່ງຕ່າງໆ ຂອງຂັ້ນເທິງ ແລະມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກ ກະຊວງ ຜທ ໃນໄລຍະ 03 ເດືອນ ຜ່ານມາ (ເດືອງ 1, 2, 3 ປີ 2022) ແລະ ວາງທິດທາງແຜນການ ໃນໄຕມາດ II (4,5,6 ປີ 2022); ເພື່ອຄົ້ນຄວ້າ ແລະ ຕົກລົງເປັນເອກະພາບກ່ຽວກັບ ຮ່າງຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບຄົ້ນຄວ້າກົນໄກ ແລະ ມາດຕະການຈັດຕັ້ງປະຕິບັດໜ້າທີ່ການເມືອງ ຂອງກະຊວງແຜນການ ແລະ ການລົງທຶນ ໃນໄລຍະການປະຕິບັດວາລະເເຫ່ງຊາດ ໃນຕໍ່ໜ້າ ແລະເພື່ອສືບຕໍ່ປັບປຸງຄວາມສາມາດການນໍາພາ-ຊີ້ນໍາ ຂອງຄະນະບໍລິຫານງານພັກກະຊວງ ຜທ ແນ່ໃສ່ປະຕິບັດໜ້າທີ່ການເມືອຂອງຕົນ ໃຫ້ນັບມື້ມີປະສິດ ທິພາບ ແລະ ປະສິດທິຜົນ.
ໃນໂອກາດດັ່ງກ່າວນີ້ ສະຫາຍ ຄຳເຈນ ວົງໂພສີ ເລຂາຄະນະບໍລິຫານງານພັກ ລັດຖະມົນຕີ ກະຊວງແຜນການ ແລະ ການລົງທຶນຍັງໄດ້ໃຫ້ກຽດໂອລົມ ແລະ ໃຫ້ທິດຊີ້້ນຳແກ່ບັນດາຄະນະພັກຮາກຖານ, ບັນດາໜ່ວຍພັກພາຍໃນກະຊວງແຜນການ ແລະ ການລົງທຶນ ວ່າເຖິງພວກເຮົາຈະມີຂໍ້ຫຍຸ້ງຍາກ, ສິ່ງທ້າທາຍທົດສອບຕ່າງໆ ອັນເນື່ອງຈາກສະພາບແວດລ້ອມພາຍນອກ ແລະ ພາຍໃນ, ແຕ່ພວກເຮົາກໍ່ມີຄວາມຕັດສິນໃຈພ້ອມກັນສູ້ຊົນຜ່ານຜ່າຂໍ້ຫຍຸ້ງຍາກຕ່າງໆ ຈັດປະຕິບັດໜ້າທີ່ວຽກງານໄດ້ຮັບຜົນສໍາເລັດຫຼາຍດ້ານ, ສິ່ງທີ່ພົ້ນເດັ່ນແມ່ນວຽກງານນຳພາສຶກສາອົບຮົມການເມືອງ-ແນວຄິດ ໃຫ້ຖັນແຖວສະມາຊິກພັກ, ພະນັກງານ ໃຫ້ສືບຕໍ່ເອົາໃຈໃສ່ຢ່າງເປັນປົກກະຕິ ແລະ ຕັ້ງໜ້າການຈັດຕັ້ງປະຕິບັດໜ້າທີ່ການ ເມືອງຕາມພາລະບົດບາດຂອງຕົນ ກໍ່ນັບມື້ໃຫ້ເອົາການປັບປຸງທີ່ມີລັກສະນະບຸກທະລຸໃນຫຼາຍດ້ານ ເປັນຕົ້ນແມ່ນ: ໄດ້ລົງເລິກຄົ້ນຄວ້ານະໂຍບາຍຊ່ວຍລັດຖະບານ, ວາລະແຫ່ງຊາດ, ການວາງແຜນພັດທະນາເສດຖະກິດ-ສັງຄົມແຫ່ງຊາດ, ວຽກງານສົ່ງເສີມການລົງທຶນ, ວຽກງານການຄຸ້ມຄອງເຂດເສດຖະກິດພິເສດ, ວຽກງາສະຖິຕິ, ວຽກງານຮ່ວມມືສາກົນ ການຍາດແຍ່ງເອົາການຊ່ວຍເຫລືອລ້າຈາກສາກົນ, ໂດຍສະເພາະແມ່ນການຮ່ວມມືກັບ ສສ ຫວຽດນາມ ແລະ ການຮ່ວມມືລາວ-ຈີນ, ການປັບປຸງກົງຈັກການຈັດຕັ້ງຂອງກະຊວງ, ວຽກພັກ-ພະນັກງານ, ວຽກງານກວດກາ, ວຽກງານປ້ອງກັນພັກ-ພະນັກງານ, ວຽກ 3 ອົງການຈັດຕັ້ງມະຫາຊົນ.